ଦଶମନ୍ତପୁର ବ୍ଲକସ୍ତରୀୟ ଶିକ୍ଷକ ପ୍ରଶିକ୍ଷଣ ଶିବିର ଉଦ୍‌ଯାପିତ

ଦଶମନ୍ତପୁର (ନିଜସ୍ୱ ପ୍ରତିନିଧି):ଦଶମନ୍ତପୁର ବ୍ଲକ ଅନ୍ତର୍ଗତ ଏ ମାଲକାନଗିରି ଉନ୍ନୀତ ଉଚ୍ଚ ବିଦ୍ୟାଳୟ ପରିସରରେ ଚାଲିଥିବା ୫ ଦିନିଆ ବ୍ଲକସ୍ତରୀୟ ପ୍ରବୋଧନ ତାଲିମ ଶିବିର ସଫଳତାର ସହ ଉଦ୍‌ଯାପିତ ହୋଇଯାଇଛି। ସରକାରଙ୍କ ଅଭିନବ ଶିକ୍ଷା ନୀତି ଅନୁସାରେ ଆୟୋଜିତ ଏହି କାର୍ଯ୍ୟକ୍ରମରେ ଶିକ୍ଷାଦାନର ନୂତନ କୌଶଳ ଉପରେ ଗୁରୁତ୍ୱାରୋପ କରାଯାଇଛି।
NEP 2020 ଓ OCF 2025 ଉପରେ ଗୁରୁତ୍ୱ
ଜାତୀୟ ଶିକ୍ଷା ନୀତି (NEP) ୨୦୨୦ ଏବଂ ଓଡ଼ିଶା ପାଠ୍ୟକ୍ରମ ରୂପଲେଖ (OCF) ୨୦୨୫ ଆଧାରରେ ଏହି ତାଲିମ ଶିବିର ଅନୁଷ୍ଠିତ ହୋଇଥିଲା। ଦ୍ୱିତୀୟ ପର୍ଯ୍ୟାୟରେ ବ୍ଲକର ପ୍ରାୟ ୧୦୦ ଜଣ ଶିକ୍ଷକ ଓ ଶିକ୍ଷୟିତ୍ରୀ ଏହି ପ୍ରଶିକ୍ଷଣ ଗ୍ରହଣ କରିଛନ୍ତି।
ଅତିଥି ଓ ପ୍ରଶିକ୍ଷକଙ୍କ ଅଭିଭାଷଣ
ଏହି କାର୍ଯ୍ୟକ୍ରମରେ ଅତିରିକ୍ତ ଗୋଷ୍ଠୀ ଶିକ୍ଷା ଅଧିକାରୀ ସୁନାଧର ସଗର ଓ ମନ୍ମଥ ମାଣ୍ଡାଙ୍ଗୀ ଅତିଥି ଭାବେ ଯୋଗଦେଇ ପ୍ରଶିକ୍ଷାର୍ଥୀମାନଙ୍କୁ ଶିକ୍ଷାଦାନର ଗୁଣାତ୍ମକ ମାନ ବୃଦ୍ଧି କରିବାକୁ ପରାମର୍ଶ ଦେଇଥିଲେ। ସମଗ୍ର ଶିକ୍ଷା ଅଭିଯାନର ଗୁଣାତ୍ମକ ଶିକ୍ଷା ସଂଯୋଜକ ଚନ୍ଦ୍ରକଳା ବଗର୍ତୀ ତାଲିମର ଆଭିମୁଖ୍ୟ ସମ୍ପର୍କରେ ବିସ୍ତୃତ ଆଲୋକପାତ କରିଥିଲେ।
ତାଲିମଦାତା ଭାବେ: ରାଜେନ୍ଦ୍ର କୁମାର ରଥ, ସାଗରିକା ମିଶ୍ର, ପ୍ରିୟ ରଞ୍ଜନ ଦାଶ, ଅଭିଷେକ ଦାଶ ପ୍ରମୁଖ ଯୋଗଦେଇ ଶିକ୍ଷକମାନଙ୍କୁ ବିଭିନ୍ନ ଆଧୁନିକ ପାଠପଢ଼ା ଶୈଳୀ ଓ ନୂତନ ପାଠ୍ୟକ୍ରମର ରୂପରେଖ ସମ୍ପର୍କରେ ତାଲିମ ପ୍ରଦାନ କରିଥିଲେ।
ସହଯୋଗ ଓ ସଂଯୋଜନା
ଉକ୍ତ ଉଦ୍‌ଘାଟନୀ ତଥା ଉଦ୍‌ଯାପନୀ କାର୍ଯ୍ୟକ୍ରମରେ ଉନ୍ନୀତ ଉଚ୍ଚ ବିଦ୍ୟାଳୟର ଭାରପ୍ରାପ୍ତ ପ୍ରଧାନଶିକ୍ଷକ ଜିତେନ୍ଦ୍ର ଗାମ୍ଫା ଉପସ୍ଥିତ ରହି ସମସ୍ତ କାର୍ଯ୍ୟକ୍ରମର ପରିଚାଳନାରେ ସହଯୋଗ କରିଥିଲେ। ଶିକ୍ଷକମାନେ ଏହି ତାଲିମ ଦ୍ୱାରା ଶ୍ରେଣୀ ଗୃହରେ ପିଲାମାନଙ୍କୁ ଅଧିକ ପ୍ରଭାବଶାଳୀ ଭାବେ ପାଠ ପଢ଼ାଇବାକୁ ସକ୍ଷମ ହେବେ ବୋଲି ଆଶା ପ୍ରକାଶ କରାଯାଇଛି।