ଜିଲ୍ଲା ସ୍ତରୀୟ ମଡେଲ ପ୍ରତିଯୋଗିତା: ବୋରିଗୁମ୍ମା ହାଇସ୍କୁଲର ଶତରୂପା ପ୍ରଥମ

ବୋରିଗୁମ୍ମା, ୧୫/୦୧ (ନିଜସ୍ୱ ପ୍ରତିନିଧି):
ବୋରିଗୁମ୍ମା ସରକାରୀ ଉଚ୍ଚ ବିଦ୍ୟାଳୟ ପାଇଁ ଗୌରବ ଆଣିଛନ୍ତି ୯ମ ଶ୍ରେଣୀର ଛାତ୍ରୀ ଶତରୂପା ମହାପାତ୍ର। କୋରାପୁଟ ଜିଲ୍ଲା ସ୍ତରୀୟ ମଡେଲ ପ୍ରଦର୍ଶନୀ ପ୍ରତିଯୋଗିତାରେ ଶତରୂପା ଶ୍ରେଷ୍ଠ ପ୍ରଦର୍ଶନ କରି ପ୍ରଥମ ସ୍ଥାନ ଅଧିକାର କରିଛନ୍ତି।
ଓଡ଼ିଶା ସରକାରଙ୍କ ଜଳ ସମ୍ପଦ ବିଭାଗ ପକ୍ଷରୁ ଜାନୁୟାରୀ ୬ରୁ ୨୦ ତାରିଖ ପର୍ଯ୍ୟନ୍ତ ‘ପାଣି ପଞ୍ଚାୟତ ପକ୍ଷ’ ପାଳନ କରାଯାଉଛି। ଏହି ଅବସରରେ ଗତ ୬ ତାରିଖରେ ବିଭାଜନ ସ୍ତରୀୟ ପ୍ରତିଯୋଗିତା ଅନୁଷ୍ଠିତ ହୋଇଥିଲା, ଯେଉଁଥିରେ ଶତରୂପା ଉଭୟ ସାଧାରଣ ଜ୍ଞାନ ଓ ମଡେଲ ପ୍ରତିଯୋଗିତାରେ ପ୍ରଥମ ସ୍ଥାନ ପାଇଥିଲେ। ଏହାପରେ ଗତ ୧୩ ତାରିଖରେ କୋରାପୁଟ ଦକ୍ଷତା ବିକାଶ କେନ୍ଦ୍ରଠାରେ ଅନୁଷ୍ଠିତ ଜିଲ୍ଲା ସ୍ତରୀୟ ପ୍ରତିଯୋଗିତାରେ ମଧ୍ୟ ସେ ନିଜର ଶ୍ରେଷ୍ଠତା ପ୍ରତିପାଦନ କରି ପ୍ରଥମ ସ୍ଥାନ ବଜାୟ ରଖିଛନ୍ତି।
ପୁରସ୍କାର ବିତରଣ:
କୋରାପୁଟ ବିଧାୟକ ଶ୍ରୀ ରଘୁରାମ ମାଛ ମୁଖ୍ୟ ଅତିଥି ଭାବେ ଯୋଗଦେଇ କୃତୀ ଛାତ୍ରୀଙ୍କୁ ମାନପତ୍ର ସହ ୩ ହଜାର ଟଙ୍କାର ପୁରସ୍କାର ଅର୍ଥରାଶି ପ୍ରଦାନ କରି ସମ୍ବର୍ଦ୍ଧିତ କରିଥିଲେ। କୃଷି ଓ ଜଳସେଚନ କ୍ଷେତ୍ରରେ ଛାତ୍ରଛାତ୍ରୀଙ୍କ ଏଭଳି ସୃଜନଶୀଳ ମଡେଲ ଚାଷୀମାନଙ୍କୁ ଜଳର ସୁବିନିଯୋଗ ସମ୍ପର୍କରେ ସଚେତନ କରିବାରେ ବେଶ ସହାୟକ ହେବ ବୋଲି ଅତିଥିମାନେ ମତ ପ୍ରକାଶ କରିଥିଲେ।
ଏହି ସଫଳତା ପଛରେ ବିଦ୍ୟାଳୟର ବିଜ୍ଞାନ ଶିକ୍ଷକ ଶ୍ରୀ ଗୌରୀ ଶଙ୍କର ସାମନ୍ତରାୟ ଓ ସହପାଠୀମାନଙ୍କ ପ୍ରେରଣା ରହିଥିବା ବେଳେ, ଶିକ୍ଷୟିତ୍ରୀ ଶ୍ରୀମତୀ ରାଜେଶ୍ୱରୀ ନାୟକ ଛାତ୍ରୀଙ୍କୁ କୋରାପୁଟ ନେଇ ପ୍ରତିଯୋଗିତାରେ ସାମିଲ କରାଇଥିଲେ। ଶତରୂପାଙ୍କ ଏହି ଗୌରବମୟ ସଫଳତା ପାଇଁ ବୋରିଗୁମ୍ମା ଅଞ୍ଚଳରେ ଖୁସିର ଲହରି ଖେଳିଯାଇଛି।