କୋରାପୁଟ, ୧୫ ଏପ୍ରିଲ (୨୦୨୬):
ଆଜି କୋରାପୁଟ ସର୍କିଟ୍ ହାଉସଠାରେ ଓଡ଼ିଶା ରାଜ୍ୟ ଶିଶୁ ଅଧିକାର ସୁରକ୍ଷା କମିଶନ (OSCPCR)ର ମାନ୍ୟବର କମିଶନର ଶ୍ରୀମତୀ ବବିତା ପାତ୍ର ଏକ ପ୍ରେସମିଟ୍ରେ ଯୋଗଦେଇ ଦେଶର ନାରୀଶକ୍ତି ପାଇଁ ଆସନ୍ତା ୧୬ରୁ ୧୮ ତାରିଖ ପର୍ଯ୍ୟନ୍ତ ସଂସଦରେ ଅନୁଷ୍ଠିତ ହେବାକୁ ଥିବା ବିଶେଷ ଅଧିବେଶନ ସମ୍ପର୍କରେ ସୂଚନା ଦେଇଛନ୍ତି। ଏହି କାର୍ଯ୍ୟକ୍ରମରେ ସମାଜସେବୀ ତଥା ମହିଳା ଓ ଶିଶୁ ଅଧିକାର କର୍ମୀ ଶ୍ରୀମତୀ ସ୍ୱାତୀ ହୋତା ଏବଂ ଶ୍ରୀମତୀ ଅଞ୍ଜଳି ମିଶ୍ର ମଧ୍ୟ ଉପସ୍ଥିତ ଥିଲେ।
ବିକଶିତ ଭାରତର ଆଧାରଶୀଳା ‘ମାତୃଶକ୍ତି ବନ୍ଦନ ଅଧିନିୟମ’:
ଶ୍ରୀମତୀ ପାତ୍ର କହିଛନ୍ତି ଯେ, ଏହି ତିନି ଦିନିଆ ଅଧିବେଶନ ୨୫ ବର୍ଷର ଅମୃତକାଳର ସବୁଠାରୁ ଗୁରୁତ୍ୱପୂର୍ଣ୍ଣ ସମୟ। ୩୩ ପ୍ରତିଶତ ମହିଳା ସଂରକ୍ଷଣ କେବଳ ଏକ ସଂଖ୍ୟା ନୁହେଁ, ବରଂ ଏହା ବିକଶିତ ଭାରତର ଆଧାରଶୀଳା। ଏହା ଦ୍ୱାରା ମହିଳାମାନେ କେବଳ ନୀତିର ହିତାଧିକାରୀ ହୋଇ ରହିବେ ନାହିଁ, ବରଂ ନୀତି ନିର୍ମାତା ସାଜିବେ। ୭ ‘ସ’ ଯଥା- ସମ୍ମାନ, ସୁରକ୍ଷା, ସମାନତା, ସହଭାଗିତା, ସଶକ୍ତିକରଣ, ସ୍ୱାବଲମ୍ବନ ଓ ସମ୍ମାନଜନକ ନେତୃତ୍ୱ ହିଁ ନାରୀ ଅଧିକାରର ମୂଳ ମନ୍ତ୍ର ବୋଲି ସେ ପ୍ରକାଶ କରିଛନ୍ତି।
ମୋଦୀ ସରକାରଙ୍କ ମହିଳା କେନ୍ଦ୍ରିକ ଯୋଜନାର ସଫଳତା:
୨୦୧୪ ମସିହାରୁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ନେତୃତ୍ୱରେ ମହିଳାମାନଙ୍କୁ ସାମାଜିକ ଓ ଆର୍ଥିକ ଭାବେ ସଶକ୍ତ କରିବା ପାଇଁ ଅନେକ ପଦକ୍ଷେପ ନିଆଯାଇଛି। ଘରେ ଘରେ ଶୌଚାଳୟ, ଉଜ୍ଜ୍ୱଳା ଗ୍ୟାସ୍, ଜନଧନ ଖାତା, ମହିଳାଙ୍କ ନାମରେ ପକ୍କା ଘର ଏବଂ ‘ଲକ୍ଷପତି ଦିଦି’ ଭଳି ଯୋଜନା ମାଧ୍ୟମରେ ମାତୃଶକ୍ତିକୁ ସମ୍ମାନିତ କରାଯାଇଛି। ଓଡ଼ିଶାରେ ମଧ୍ୟ ମୋଦୀଜୀଙ୍କ ମାର୍ଗଦର୍ଶନରେ ‘ସୁଭଦ୍ରା ଯୋଜନା’ ମହିଳା ସଶକ୍ତିକରଣ କ୍ଷେତ୍ରରେ ଏକ ନୂତନ ଇତିହାସ ରଚିଛି।
ସମର୍ଥନ ପାଇଁ ଆହ୍ୱାନ:
ଏହି ଐତିହାସିକ ମୁହୂର୍ତ୍ତକୁ ସାରା ରାଜ୍ୟରେ ଉତ୍ସବ ଭାବେ ପାଳନ କରିବାକୁ ଶ୍ରୀମତୀ ପାତ୍ର ଅନୁରୋଧ କରିଛନ୍ତି। ଏହି ମହତ ଅଭିଯାନରେ ସାମିଲ ହେବା ପାଇଁ ୯୬୬୭୧୭୩୩୩୩ ନମ୍ବରରେ ମିସ୍ କଲ୍ ଦେଇ ନିଜର ସମର୍ଥନ ଜାହିର କରିବାକୁ ସେ ମହିଳାମାନଙ୍କୁ ଆହ୍ୱାନ ଦେଇଛନ୍ତି। ସୋସିଆଲ ମିଡିଆ ମାଧ୍ୟମରେ ନିଜର ଗର୍ବକୁ ପରିପ୍ରକାଶ କରିବା ସହ ବିପୁଳ ସଂଖ୍ୟାରେ ଏହି ସମର୍ଥନ ଶୋଭାଯାତ୍ରା ଓ ସଭାରେ ସାମିଲ ହେବାକୁ ପ୍ରେସମିଟ୍ରେ ଆହ୍ୱାନ ଦିଆଯାଇଛି।
