କୋରାପୁଟ, ଡିସେମ୍ବର ୧୧ : ଗୌରବ ଜାତୀୟ ଉତ୍ସବକୁ ଦୃଷ୍ଟିରେ ରଖି ଟ୍ରାଫିକ୍ ସମସ୍ୟାକୁ ନିୟନ୍ତ୍ରଣ କରିବା ଉଦ୍ଦେଶ୍ୟରେ ଆଜି କୋରାପୁଟ ଜିଲ୍ଲା ମୁଖ୍ୟାଳୟ ନିକଟସ୍ଥ ଜାତୀୟ ରାଜପଥ ପାର୍ଶ୍ୱରେ ଥିବା ସମସ୍ତ ଜବରଦଖଲ ଉଚ୍ଛେଦ କରାଯାଇଛି। ପୌର ପ୍ରଶାସନ ଓ ଟାଉନ୍ ପୋଲିସ୍ର ଏକ ମିଳିତ ଦଳ ଏହି ଅଭିଯାନ ଆରମ୍ଭ କରି ବହୁ ବ୍ୟବସାୟିକ ପ୍ରତିଷ୍ଠାନକୁ ଉଚ୍ଛେଦ କରିଛି।
ବାରମ୍ବାର ନୋଟିସ୍ ପରେ ବୁଲଡୋଜର୍
ମିଳିଥିବା ସୂଚନା ଅନୁଯାୟୀ , କୋରାପୁଟ ଜିଲ୍ଲାକୁ ସଂଯୋଗ କରୁଥିବା ଜାତୀୟ ରାଜପଥ ଏବଂ ପୌର ପରିଷଦ ପଥରେ ଜବରଦଖଲ ଯୋଗୁଁ ଟ୍ରାଫିକ୍ ସମସ୍ୟା ଦିନକୁ ଦିନ ବଢ଼ିବାରେ ଲାଗିଥିଲା। ପ୍ରଶାସନ ପକ୍ଷରୁ ପୂର୍ବରୁ ବାରମ୍ବାର ଡାକବାଜି ଯନ୍ତ୍ର ମାଧ୍ୟମରେ ସୂଚନା ଦିଆଯିବା ସହ ଜବରଦଖଲକାରୀଙ୍କୁ ନୋଟିସ୍ ମଧ୍ୟ ପ୍ରଦାନ କରାଯାଇଥିଲା। ତେବେ ବ୍ୟବସାୟୀମାନେ ଏହି ନିର୍ଦ୍ଦେଶକୁ ଅବମାନନା କରିବାରୁ ଆଜି ପ୍ରଶାସନ ବୁଲଡୋଜର୍ ଲଗାଇ ଉଚ୍ଛେଦ ଅଭିଯାନକୁ କାର୍ଯ୍ୟକାରୀ କରିଛି ।
ଟ୍ରାଫିକ୍ ନିୟନ୍ତ୍ରଣ ଓ ଦୁର୍ଘଟଣା ରୋକିବା ଲକ୍ଷ୍ୟ
ଏହି ଉଚ୍ଛେଦ ଅଭିଯାନର ମୁଖ୍ୟ ଲକ୍ଷ୍ୟ ହେଉଛି ଆଗାମୀ ଗୌରବ ଜାତୀୟ ଉତ୍ସବ ସମୟରେ ଟ୍ରାଫିକ୍ ସମସ୍ୟାକୁ ନିୟନ୍ତ୍ରଣ କରିବା ଏବଂ ରାସ୍ତାରେ ହେଉଥିବା ଦୁର୍ଘଟଣାକୁ ରୋକିବା।
ଏ ସମ୍ପର୍କରେ କୋରାପୁଟ ପୌର ନିର୍ଭୟ ଅଧିକାରୀ ଶ୍ରୀ ଜ୍ଞାନଜିତ ତ୍ରିପାଠୀ ସୂଚନା ଦେଇ କହିଛନ୍ତି: “ବାରମ୍ବାର ସଚେତନ କରାଯିବା ଏବଂ ନୋଟିସ୍ ଦିଆଯିବା ପରେ ମଧ୍ୟ ଏନ୍.ଏଚ୍. ପାର୍ଶ୍ୱରେ ଜବରଦଖଲ ହଟାଯାଇନଥିଲା । ଏନ୍.ଏଚ୍. ଜାମ୍ ହେବା ସହିତ ଦୁର୍ଘଟଣାର ବହୁତ ସମ୍ଭାବନା ରହୁଥିବାରୁ, ଜିଲ୍ଲା ପ୍ରଶାସନ ତରଫରୁ ଏହି ଯୌଥ କାର୍ଯ୍ୟକ୍ରମ କରାଯାଇଛି। ସମସ୍ତ ଏନ୍.ଏଚ୍. ଏରିଆକୁ ସମ୍ପୂର୍ଣ୍ଣ ଖାଲି କରି ରଖାଯାଉଛି। ଏହାଦ୍ୱାରା ଟ୍ରାଫିକ୍ ନିୟନ୍ତ୍ରଣ ହେବା ସହ ଜିଲ୍ଲାବାସୀଙ୍କୁ ନିଶ୍ଚିତ ସୁବିଧା ମିଳିବ” ।
ଜିଲ୍ଲା ପ୍ରଶାସନ ପକ୍ଷରୁ କୁହାଯାଇଛି ଯେ, ଟ୍ରାଫିକ୍ ନିୟନ୍ତ୍ରଣ ଓ ଦୁର୍ଘଟଣାକୁ ରୋକିବା ପାଇଁ ଆଗାମୀ ଦିନରେ ମଧ୍ୟ ଏହିପରି ଉଚ୍ଛେଦ ଅଭିଯାନ ଜାରି ରହିବ।
