କୋରାପୁଟ,ଜୟପୁର,୨୩/୧୧: ଓଡ଼ିଶା ରାଜ୍ୟ ଅଣଗେଜେଟେଡ୍ କର୍ମଚାରୀ ସମନ୍ବୟ ସମିତି (Odisha State Non-Gazetted Employees’ Coordination Committee), କୋରାପୁଟ ଜିଲ୍ଲା ଶାଖା ପକ୍ଷରୁ ଗତକାଲି ଜୟପୁର ଯାଦବ ଭବନ ଠାରେ ଏକ ଗୁରୁତ୍ବପୂର୍ଣ୍ଣ ବୈଠକ ଅନୁଷ୍ଠିତ ହୋଇଯାଇଛି। କୋରାପୁଟ ଜିଲ୍ଲା ଶାଖାର ସଭାପତି ଶ୍ରୀ ଶଶୀଭୂଷଣ ଦାଶଙ୍କ ଆହ୍ବାନ କ୍ରମେ ବିଭିନ୍ନ ବିଭାଗରେ କାର୍ଯ୍ୟରତ ବହୁ ସଂଖ୍ୟକ ଅଣଗେଜେଟେଡ୍ କର୍ମଚାରୀ ଏଥିରେ ଯୋଗ ଦେଇଥିଲେ।
ବୈଠକରେ ଅଣଗେଜେଟେଡ୍ କର୍ମଚାରୀମାନଙ୍କର ବିଭିନ୍ନ ସମସ୍ୟା ଓ ନ୍ୟାୟୋଚିତ ଦାବି ସମ୍ପର୍କରେ ବିସ୍ତୃତ ଆଲୋଚନା କରାଯାଇଥିଲା। ସମିତିର ମୁଖ୍ୟ ଦାବିଗୁଡ଼ିକ ମଧ୍ୟରେ ସମସ୍ତ କର୍ମଚାରୀଙ୍କୁ ୨୦ ଲକ୍ଷ ଟଙ୍କା ଯୋଗାଇଦେବା, ନୂତନ ପେନସନ୍ ସ୍କିମ୍ ବଦଳରେ ପୁରୁଣା ପେନସନ ବ୍ୟବସ୍ଥା (OPS) ଲାଗୁ କରିବା ଏବଂ ପୁରୁଣା ନିୟମ ଅନୁସାରେ ଅନୁକମ୍ପା ମୂଳକ ନିଯୁକ୍ତି ପ୍ରଦାନ କରିବା ଆଦି ଅନ୍ତର୍ଭୁକ୍ତ।
ରାଜ୍ୟ ସରକାରଙ୍କ ଦୃଷ୍ଟି ଆକର୍ଷଣ କରିବା ଉଦ୍ଦେଶ୍ୟରେ ଏକ ବଡ଼ ନିଷ୍ପତ୍ତି ନିଆଯାଇଛି ଯେ, ଆସନ୍ତା ଡିସେମ୍ବର ୨୧ ତାରିଖ (୨୧.୧୨.୨୦୨୫) ଦିନ ଜୟପୁର ଠାରେ ଏକ ବିଶାଳ ସମାବେଶ ଆୟୋଜନ କରାଯିବ। ସମିତିର ଏହି ନ୍ୟାୟପୂର୍ଣ୍ଣ ଦାବିଗୁଡ଼ିକୁ କାର୍ଯ୍ୟକାରୀ କରିବା ପାଇଁ ସରକାରଙ୍କ ଉପରେ ଚାପ ପକାଇବା ଏହାର ମୁଖ୍ୟ ଲକ୍ଷ୍ୟ।
ଉକ୍ତ ବୈଠକରେ କୋରାପୁଟ ଜିଲ୍ଲା ଶାଖାର ସମ୍ପାଦକ ଶ୍ରୀ ମହେଶ୍ୱର ମିଶ୍ର, ସହ-ସମ୍ପାଦକ ଶ୍ରୀ ଲକ୍ଷ୍ମୀକାନ୍ତ ଦାଶ, ଉପଦେଷ୍ଟା ଶ୍ରୀ କୈଳାସ ସାମନ୍ତରାୟ ଏବଂ କାର୍ଯ୍ୟ କାରିଣୀ ସଦସ୍ୟ ଶ୍ରୀ ଅଜୟ କୁମାର ପ୍ରଧାନଙ୍କ ସମେତ ଶ୍ରୀ ସୁଧାକର ପଣ୍ଡା, ଶ୍ରୀ ଜଗଦିଶ ମିଶ୍ର, ଶ୍ରୀ ଭାଗିରଥି ବାରିକ, ଶ୍ରୀ ଅଜିତ୍ କୁମାର ସତପଥି, ଶ୍ରୀ ସୁସିଲ଼ ପ୍ରେମ୍ ନାଗ, ଶ୍ରୀ ସଞ୍ଜିତ୍ ସୁନା, ଶ୍ରୀ କୁମୁଦ କୁମାର ମିଶ୍ର ଓ ଶ୍ରୀ ଦିଲିପ୍ କୁମାର ମିଶ୍ର ଆଦି ବହୁ ବରିଷ୍ଠ ସଦସ୍ୟ ଉପସ୍ଥିତ ଥିଲେ।
ଶେଷରେ ସଭାପତି ଶ୍ରୀ ଶଶୀଭୂଷଣ ଦାଶ ସମସ୍ତ ଉପସ୍ଥିତ ସଦସ୍ୟଙ୍କୁ ଧନ୍ୟବାଦ ଅର୍ପଣ କରି ସଭା ସାଙ୍ଗ କରିଥିଲେ। ସମସ୍ତ କର୍ମଚାରୀଙ୍କ ସହଯୋଗରେ ଆଗାମୀ ସମାବେଶକୁ ସଫଳ କରିବାକୁ ସମିତି ଦୃଢ଼ ସଂକଳ୍ପ ନେଇଛି।
