ଡି ଏ ଭି ସ୍କୁଲରେ ‘ବିଜ୍ଞାନ ମେଳା ଓ ଖାଦ୍ୟ ପର୍ବ’ ଅନୁଷ୍ଠିତ ; ଛାତ୍ରଛାତ୍ରୀଙ୍କ ଉତ୍ସାହ

ବୋରିଗୁମ୍ମା: ଗତ ଦୁଇ ଦିନ ଧରି ସ୍ଥାନୀୟ ଡି ଏ ଭି ଇଂରାଜୀ ମିଡିୟମ ସ୍କୁଲ, ବୋରିଗୁମ୍ମା ଠାରେ ଏକ ଆକର୍ଷଣୀୟ ବିଜ୍ଞାନ ମେଳା ଏବଂ ଖାଦ୍ୟ ପର୍ବ (ଫୁଡ୍ ଫେଷ୍ଟିଭାଲ) ମହାସମାରୋହରେ ଅନୁଷ୍ଠିତ ହୋଇଯାଇଛି। ଛାତ୍ରଛାତ୍ରୀଙ୍କ ମଧ୍ୟରେ ବୈଜ୍ଞାନିକ ମନୋଭାବ ଓ ଖାଦ୍ୟ ବିଷୟରେ ଜ୍ଞାନ ବୃଦ୍ଧି କରିବା ଏହି କାର୍ଯ୍ୟକ୍ରମର ମୁଖ୍ୟ ଲକ୍ଷ୍ୟ ଥିଲା।
ବିଜ୍ଞାନ ମେଳାରେ ୫୦ରୁ ଊର୍ଦ୍ଧ୍ୱ ପ୍ରକଳ୍ପ:
ପ୍ରଥମ ଦିନରେ କୁନି ବୈଜ୍ଞାନିକ ଛାତ୍ରଛାତ୍ରୀଙ୍କ ଦ୍ୱାରା ପ୍ରାୟ ୫୦ରୁ ଊର୍ଦ୍ଧ୍ୱ ବିଜ୍ଞାନ ପ୍ରକଳ୍ପ ପ୍ରଦର୍ଶିତ କରାଯାଇଥିଲା। ପ୍ରଦର୍ଶିତ ପ୍ରକଳ୍ପଗୁଡ଼ିକ ଅତ୍ୟନ୍ତ ଉଚ୍ଚକୋଟୀର ଥିଲା। ବିଜ୍ଞାନ ମେଳାକୁ ବିଦ୍ୟାଳୟ ପରିଚାଳନା କମିଟିର ସଭାପତି ଏନ୍ ରାଜେଶ କୁମାର, ସଭ୍ୟ ରାଜେଶ କୁମାର ନାୟକ, ପଦ୍ମ ଲୋଚନ ଦାଶ, ଗୁପ୍ତେଶ୍ୱର ରାଉତ ତଥା ଅଧ୍ୟକ୍ଷ ଏମ୍ ଆଦିନାରାୟଣା ଆନୁଷ୍ଠାନିକ ଭାବେ ଉଦଘାଟନ କରିଥିଲେ। ଅଧ୍ୟାପକ ପଦ୍ମ ଲୋଚନ ଦାଶ ଏବଂ ବିଜ୍ଞାନ ଶିକ୍ଷକ ଗୁପ୍ତେଶ୍ୱର ରାଉତ ପ୍ରକଳ୍ପଗୁଡ଼ିକୁ ପରିଦର୍ଶନ କରି ମାର୍କ ପ୍ରଦାନ କରିଥିଲେ।
ଦ୍ୱିତୀୟ ଦିନରେ ଖାଦ୍ୟ ପର୍ବର ଆୟୋଜନ:
କାର୍ଯ୍ୟକ୍ରମର ଦ୍ୱିତୀୟ ଦିବସରେ ଫୁଡ୍ ଫେଷ୍ଟିଭାଲ ଅନୁଷ୍ଠିତ ହୋଇଥିଲା। ଏଥିରେ ଛାତ୍ରଛାତ୍ରୀମାନେ ନିଜ ହାତ ତିଆରି ବିଭିନ୍ନ ପ୍ରକାରର ଦେଶୀ ତଥା ଆଧୁନିକ ଖାଦ୍ୟ ବ୍ୟଞ୍ଜନ ପ୍ରଦର୍ଶନ ଓ ବିକ୍ରୟ ପାଇଁ ଆଣିଥିଲେ। ଉପସ୍ଥିତ ସମସ୍ତ ଅତିଥି ଏବଂ ଅଭିଭାବକମାନେ ଏହି ବ୍ୟଞ୍ଜନର ସ୍ୱାଦ ଚାଖି ଛାତ୍ରଛାତ୍ରୀଙ୍କ ଉଦ୍ୟମକୁ ପ୍ରଶଂସା କରିଥିଲେ।
ଏହି ଦିନ ଅତିଥି ଭାବେ ସ୍ଥାନୀୟ ସରପଞ୍ଚ ତୁଷାରକାନ୍ତ କୁମ୍ବ୍ରିକା, ଗୋଲୋକ ଚୌଧୁରୀ, ମୁନା ନାୟକ, ଶ୍ରୀମତୀ ମଧୁସ୍ମିତା ନାୟକଙ୍କ ସମେତ ପ୍ରାୟ ସମସ୍ତ ଛାତ୍ରଛାତ୍ରୀଙ୍କ ପିତାମାତା, ଅଭିଭାବକ ଏବଂ କମିଟି ସଦସ୍ୟ ଉପସ୍ଥିତ ରହିଥିଲେ।
ଉଦ୍ଦେଶ୍ୟ ଓ ସଫଳତା:
ସଭାପତି ଏନ୍ ରାଜେଶ କୁମାର ଏହି ଅବସରରେ କହିଥିଲେ ଯେ, ଏଭଳି କାର୍ଯ୍ୟକ୍ରମ ଆୟୋଜନ ଦ୍ୱାରା ଛାତ୍ରଛାତ୍ରୀଙ୍କ ମଧ୍ୟରେ ଖାଦ୍ୟ ବିନିମୟ, ନୂଆ ନୂଆ ଖାଦ୍ୟ ବ୍ୟଞ୍ଜନ ବିଷୟରେ ଜାଣିବା ଏବଂ ବିଜ୍ଞାନ ପ୍ରତି ଆଗ୍ରହ ପ୍ରକାଶ କରିବା ହିଁ ମୁଖ୍ୟ ଉଦ୍ଦେଶ୍ୟ। ଏହି ସମ୍ପୂର୍ଣ୍ଣ ଦୁଇ ଦିନିଆ କାର୍ଯ୍ୟକ୍ରମକୁ ଡି ଏ ଭି ସ୍କୁଲର ପ୍ରିନ୍ସିପାଲ, ଭାଇସ ପ୍ରିନ୍ସିପାଲ, ସମସ୍ତ ଶିକ୍ଷକ ଶିକ୍ଷୟିତ୍ରୀ, ସେବିକା ଏବଂ ବିଶେଷ କରି ଛାତ୍ରଛାତ୍ରୀମାନେ ପୂର୍ଣ୍ଣ ସହଯୋଗ କରି ଏହାକୁ ସଫଳ କରିଥିଲେ।