ମକାମଣ୍ଡି ପାଇଁ ବିଧାନସଭାରେ ଝରିଗାଁ ବିଧାୟକଙ୍କ ପ୍ରସ୍ତାବ: ନବରଙ୍ଗପୁର ମକା ଚାଷୀଙ୍କୁ ଉଚିତ ମୂଲ୍ୟ ଦେବାକୁ ଦାବି

ଝରିଗାଁ (ବ୍ୟୁରୋ ରିପୋର୍ଟ) ନବରଙ୍ଗପୁର ଜିଲ୍ଲାର ମକା ଚାଷୀମାନେ ପ୍ରତିବର୍ଷ ସହୁଥିବା ଆର୍ଥିକ କ୍ଷତିକୁ ଦୂର କରିବା ପାଇଁ, ଝରିଗାଁ ବିଧାୟକ ଶ୍ରୀ ନରସିଂହ ଭତରା ବିଧାନସଭାର ଚଳିତ ଶୀତ ଅଧିବେଶନରେ ଏକ ଗୁରୁତ୍ୱପୂର୍ଣ୍ଣ ପ୍ରସ୍ତାବ ଉପସ୍ଥାପନ କରିଛନ୍ତି। ସେ ଜିଲ୍ଲାରେ ତୁରନ୍ତ ମକା ମଣ୍ଡିର ବ୍ୟବସ୍ଥା କରିବା ସହ ଧାନ ଭଳି ମକା ପାଇଁ ସର୍ବନିମ୍ନ ସହାୟକ ମୂଲ୍ୟ (MSP) ଧାର୍ଯ୍ୟ କରିବାକୁ ଦାବି କରିଛନ୍ତି।
ଓଡ଼ିଶାରେ ପ୍ରଥମ ସ୍ଥାନରେ ନବରଙ୍ଗପୁର:
ଆଦିବାସୀ ବହୁଳ ନବରଙ୍ଗପୁର ଜିଲ୍ଲାର ମୁଖ୍ୟ ଜୀବିକା ହେଉଛି ଚାଷ। ଅର୍ଥକାରୀ ଫସଲ ଭାବେ ଏଠାରେ ମକାକୁ ପ୍ରାଧାନ୍ୟ ଦିଆଯାଏ ଏବଂ ମକା ଉତ୍ପାଦନ କ୍ଷେତ୍ରରେ ଏହି ଜିଲ୍ଲା ଓଡ଼ିଶାରେ ପ୍ରଥମ ସ୍ଥାନରେ ରହିଛି।
ବଜାର ଅଭାବରୁ ଚାଷୀ କ୍ଷତିରେ:
ବିଧାୟକ ଭତରା ଗୃହର ଦୃଷ୍ଟି ଆକର୍ଷଣ କରି କହିଛନ୍ତି ଯେ ଅଧିକ ଉତ୍ପାଦନ ସତ୍ତ୍ୱେ ମକା ବିକ୍ରୟ ପାଇଁ କୌଣସି ସ୍ଥାୟୀ ବଜାର କିମ୍ବା ମଣ୍ଡିର ବ୍ୟବସ୍ଥା ନଥିବାରୁ ଏଠାକାର ଶହ ଶହ ମକା ଚାଷୀ ପ୍ରତିବର୍ଷ କ୍ଷତି ସହୁଛନ୍ତି। ବୁଲା ବେପାରୀମାନେ ସେମାନଙ୍କ ଇଚ୍ଛା ମୁତାବକ ଅତି କମ୍ ମୂଲ୍ୟ ଦେଇ ମକା କ୍ରୟ କରୁଛନ୍ତି, ଯାହା ଫଳରେ ଚାଷୀମାନେ ଆର୍ଥିକ କ୍ଷତି ସହିବାକୁ ବାଧ୍ୟ ହେଉଛନ୍ତି।
MSP ଓ ମଣ୍ଡି ପାଇଁ ଦାବି:
ଏହି ସମସ୍ୟାର ସ୍ଥାୟୀ ସମାଧାନ ପାଇଁ ଶ୍ରୀ ଭତରା ପ୍ରସ୍ତାବ ଦେଇଛନ୍ତି ଯେ, ଏ ଅଞ୍ଚଳରେ ତୁରନ୍ତ ମକା ମଣ୍ଡିର ବ୍ୟବସ୍ଥା କରାଯିବା ଆବଶ୍ୟକ। ଏହା ସହିତ ଧାନ ଭଳି ମକା ପାଇଁ ମଧ୍ୟ ଏମ୍‌ଏସ୍‌ପି (MSP) ଧାର୍ଯ୍ୟ କରାଗଲେ, ଏଠାକାର ମକା ଚାଷୀମାନେ ଉଚିତ ମୂଲ୍ୟ ପାଇବା ସହ ଉପକୃତ ହୋଇପାରିବେ। ଏହି ପ୍ରସ୍ତାବକୁ ସମଗ୍ର ଜିଲ୍ଲାର ମକା ଚାଷୀ ସମାଜରେ ସ୍ୱାଗତ କରାଯାଇଛି।