ବନାରସ ସାହିତ୍ୟ ମହୋତ୍ସବରେ ଚମକିଲେ ମାଲକାନଗିରି ଝିଅ: ରାଜେଶ୍ୱରୀଙ୍କୁ ମିଳିଲା ‘ଭାରତ କବି ରତ୍ନ’ ପୁରସ୍କାର
ମାଲକାନଗିରି: ୨।୨ : କାଶୀ ର ପବିତ୍ର ଭୂମିରେ ମାଲକାନଗିରିର ଝିଅ ଡି. ରାଜ ରାଜେଶ୍ୱରୀ ପଟ୍ଟନାୟକ ଓଡ଼ିଶା ପାଇଁ ଗୌରବ ଆଣିଛନ୍ତି। ନବ ଭାରତୀୟ ଓ ନିର୍ମାଣ ସମିତି ଏବଂ କେନ୍ଦ୍ର ସଂସ୍କୃତି ମନ୍ତ୍ରାଳୟର ଯୁଗ୍ମ ଆନୁକୂଲ୍ୟରେ ବନାରସର ହୋଟେଲ ତାଜ୍ ଠାରେ ଅନୁଷ୍ଠିତ ଚତୁର୍ଥ ‘ବନାରସ ସାହିତ୍ୟ ମହୋତ୍ସବ’ରେ ରାଜେଶ୍ୱରୀଙ୍କୁ ପ୍ରତିଷ୍ଠିତ ‘ଭାରତ କବି ରତ୍ନ’ ପୁରସ୍କାରରେ ସମ୍ମାନିତ କରାଯାଇଛି।ସାହିତ୍ୟ ଓ କଳାର ମହାସଙ୍ଗମ:ଜାନୁଆରୀ ୩୦ରୁ ଫେବ୍ରୁଆରି ୧ ତାରିଖ ପର୍ଯ୍ୟନ୍ତ ଚାଲିଥିବା ଏହି ତିନିଦିନିଆ ମହୋତ୍ସବରେ ଦେଶର ବିଭିନ୍ନ ପ୍ରାନ୍ତରୁ ପ୍ରାୟ ୧୦୦୦ରୁ ଊର୍ଦ୍ଧ୍ୱ ପ୍ରତିଯୋଗୀ ଅଂଶଗ୍ରହଣ କରିଥିଲେ। କେନ୍ଦ୍ର ସଂସ୍କୃତି ମନ୍ତ୍ରାଳୟ ପକ୍ଷରୁ ଓଡ଼ିଶାର ପ୍ରତିନିଧି ଭାବେ ଚୟନ ହୋଇଥିବା ରାଜେଶ୍ୱରୀ ଇଂରାଜୀ ଓ ହିନ୍ଦୀ ଭାଷାରେ କବିତା ଏବଂ ପ୍ରବନ୍ଧ ଲିଖନରେ ନିଜର ପାରଦର୍ଶିତା ପ୍ରଦର୍ଶନ କରିଥିଲେ। ବିଶେଷ କରି ଇଂରାଜୀ ଭାଷାରେ ଜଣେ ଦକ୍ଷ କବୟିତ୍ରୀ ଭାବେ ସେ ବିଚାରକଙ୍କ ଉଚ୍ଚ ପ୍ରଶଂସା ସାଉଁଟିଛନ୍ତି।ମଞ୍ଚରେ ତାରକାଙ୍କ ଉପସ୍ଥିତି:ଏହି ଗରିମାମୟ କାର୍ଯ୍ୟକ୍ରମରେ ଅତିଥି ଭାବେ ଦେଶର ବହୁ ବିଶିଷ୍ଟ ବ୍ୟକ୍ତିତ୍ୱ ଯୋଗ ଦେଇଥିଲେ:ପଦ୍ମ ବିଭୂଷଣ ଅନୁପମ ଖେର (ଖ୍ୟାତନାମା ଅଭିନେତା)ପଦ୍ମଶ୍ରୀ ମାଲିନୀ ଅବସ୍ତି (ଲୋକ ଗାୟିକା)ପଦ୍ମଶ୍ରୀ ଶୀନ ଖାଫ ନିଜାମ (ଉର୍ଦ୍ଦୁ କବି)ପିୟୁଷ ମିଶ୍ର (କବି ଓ ଗୀତିକାର), ଯାହାଙ୍କ କବିତା ପାଠ ମୁଖ୍ୟ ଆକର୍ଷଣ ଥିଲାରୁବିକା ଲିୟାକତ (ବିଶିଷ୍ଟ ସାମ୍ବାଦିକା) ଏବଂ ଲେଫ୍ଟ ଜେନେରାଲ ଆନନ୍ଦ ଚରିୟାନ।ସଫଳତାର ପୃଷ୍ଠଭୂମି:ରାଜେଶ୍ୱରୀ ହେଉଛନ୍ତି ମାଲକାନଗିରିର ବରିଷ୍ଠ ସାମ୍ବାଦିକ ଦମ୍ପତି ଗୋପୀ କୃଷ୍ଣ ପଟ୍ଟନାୟକ ଓ ହେମଲତା ପଟ୍ଟନାୟକଙ୍କ ସୁକନ୍ୟା। ସେ ମାଲକାନଗିରିରେ ଦଶମ ପର୍ଯ୍ୟନ୍ତ ଶିକ୍ଷା ସମାପ୍ତ କରିବା ପରେ ବିଶାଖାପାଟଣାରେ ଯୁକ୍ତ ଦୁଇ ପଢ଼ିଥିଲେ। ବର୍ତ୍ତମାନ ସେ ଭୁବନେଶ୍ୱରରେ ନିଶ୍ଚେତକ ପାରାମେଡିକାଲ ବିଭାଗରେ ସ୍ନାତକ ଶେଷ ବର୍ଷର ଛାତ୍ରୀ। ଚିକିତ୍ସା ବିଜ୍ଞାନର ଛାତ୍ରୀ ହୋଇ ମଧ୍ୟ ସାହିତ୍ୟ ପ୍ରତି ତାଙ୍କର ଏହି ନିଷ୍ଠା ଓ ଅନେକ ପତ୍ରପତ୍ରିକାରେ ପ୍ରକାଶିତ ତାଙ୍କର କବିତା ସମସ୍ତଙ୍କୁ ପ୍ରେରିତ କରିଛି।ତାଙ୍କର ଏହି ବିରଳ ସଫଳତା ପାଇଁ ମାଲକାନଗିରି ଜିଲ୍ଲା ତଥା ସମଗ୍ର ରାଜ୍ୟରେ ଏବେ ଶୁଭେଚ୍ଛାର ସୁଅ ଛୁଟିଛି। ରାଜେଶ୍ୱରୀଙ୍କ ଏହି ସଫଳତା ଯୁବ ପିଢ଼ିଙ୍କ ପାଇଁ ଏକ ନୂତନ ଦିଗଦର୍ଶନ ସାଜିଛି।
