* ଦକ୍ଷିଣ ବସ୍ତର ଜଙ୍ଗଲ ଘେରିଲେ ୨ ହଜାର ଯବାନ; ଆସନ୍ତା ଘଣ୍ଟା ମଧ୍ୟରେ ବଡ଼ ଏନ୍କାଉଣ୍ଟର ସମ୍ଭାବନା
କୋରାପୁଟ, ୯/୧୧, ଅଭିବ୍ୟକ୍ତ କୋରାପୁଟ ଜିଲ୍ଲାର ଛତିଶଗଡ଼ର ଦକ୍ଷିଣ ବସ୍ତର ଅଞ୍ଚଳରେ ମାଓବାଦୀ ବିରୋଧୀ ବୃହତ୍ ଅଭିଯାନ ଜାରି ରହିଛି। ଦନ୍ତେୱାଡା, ବିଜାପୁର ଓ ସୁକମା ଜିଲ୍ଲା ସୀମାନ୍ତରେ ଥିବା ୧୨୫ ଗାଁକୁ ଘେରି ୨ ହଜାର ସୁରକ୍ଷା ଯବାନ ଅପରେସନ କରୁଛନ୍ତି। ଏହି ବୃହତ୍ ଅପରେସନର ଲକ୍ଷ୍ୟ ହେଲା — ପିଏଲଜିଏ ବାଟାଲିୟନ୍–୧ର ମୁଖ୍ୟ ଏବଂ ସିସି ମେମ୍ବର ଦୁର୍ଦ୍ଦାନ୍ତ ମାଓ ନେତା ହିଡମା, ସହନେତା ଦେବା ଓ ଏରାଙ୍କୁ ଧରିବା କିମ୍ବା ମାରିବା।
ପୁଲିସ ସୂତ୍ର ଅନୁସାରେ, ହିଡମା ନାମରେ ଭାରତର ବିଭିନ୍ନ ରାଜ୍ୟରେ ମୋଟ ଅଢ଼େଇ କୋଟି ଟଙ୍କା ପୁରସ୍କାର ଘୋଷିତ ଅଛି। ଏହି ଅପରେସନକୁ ତିନି ଜିଲ୍ଲାର ଏସପିମାନେ ସଂଯୁକ୍ତ ଭାବେ ନେତୃତ୍ବ ଦେଉଛନ୍ତି।
ସୁରକ୍ଷା ବାହିନୀ ଏବେ ହେଲିକପ୍ଟର ଓ ଡ୍ରୋନ ମାଧ୍ୟମରେ ମାଓ ଗତିବିଧି ନିରୀକ୍ଷଣ କରୁଛନ୍ତି। ହିଡମା ଓ ତାଙ୍କ ଦଳ କେଉଁ ଗାଁରେ ଲୁଚିଥିବେ ସେଥି ପାଇଁ ଡ୍ରୋନ ଚଳାଯାଉଛି। ଏହା ସହିତ, ଆବଶ୍ୟକ ହେଲେ ହେଲିକପ୍ଟର ମାଧ୍ୟମରେ ଆକ୍ରମଣ କରିବା ପାଇଁ ମଧ୍ୟ ସେନା ପ୍ରସ୍ତୁତ ଅଛି।
ପୁଲିସ ଅଧିକାରୀମାନେ କହିଛନ୍ତି ଯେ, ହିଡମା ଅତ୍ୟନ୍ତ ଚାଳାକ ଓ ଯୁଦ୍ଧକୌଶଳରେ ପାରଦର୍ଶୀ। ପୂର୍ବରୁ ଅନେକ ଅପରେସନରେ ସେ ପୁଲିସ ଘେରାଉ ଭାଙ୍ଗି ପଳାଇ ପାରିଥିଲା। ଗତ ଜାନୁଆରିରେ ମଧ୍ୟ ଏକ ବିଶେଷ ଅପରେସନରେ ହିଡମା ଘେରାଉ ହୋଇଥିଲେ କିନ୍ତୁ ଜୀବନ୍ତ ରହି ପଳାଇ ଯାଇଥିଲେ।
ଏହି ସମୟରେ ଡିଆରଜି, ଏସଟିଏଫ, ସିଆରପିଏଫ ଓ ବିଏସଏଫ ଯବାନ ଯୁକ୍ତ ଭାବେ ଅଭିଯାନରେ ଅଂଶ ନେଉଛନ୍ତି। ସୁରକ୍ଷା ବାହିନୀ ଘେରିଥିବା ଗାଁଗୁଡିକର ନାଗରିକଙ୍କୁ ପୂର୍ବରୁ ସଚେତନ କରାଯାଇଛି ଯେ, ମାଓବାଦୀଙ୍କୁ ସହଯୋଗ କଲେ କାନୁନୀ ପଦକ୍ଷେପ ନିଆଯିବ।
ପୁଲିସ ଅନୁମାନ କରୁଛି ଯେ ଆସନ୍ତା କିଛି ଘଣ୍ଟା ମଧ୍ୟରେ ମାଓ ଓ ଯବାନଙ୍କ ମଧ୍ୟରେ ଭେଟାଭେଟି ହେଲେ ବଡ଼ ଏନ୍କାଉଣ୍ଟର ହେବା ସମ୍ଭାବନା ରହିଛି। ଏହି ଅଭିଯାନ ସଫଳ ହେଲେ, ଦକ୍ଷିଣ ବସ୍ତରରେ ନକ୍ସଲ ଆତଙ୍କ ଉପରେ ଦୀର୍ଘମିଆଦି ଘାତ ଲାଗିବ ବୋଲି ସୁରକ୍ଷା ବାହିନୀ ପକ୍ଷରୁ କୁହାଯାଇଛି।
