ହରଡାପୁଟଠାରେ ଜିଲ୍ଲା ସ୍ତରୀୟ ଏସଏସଡି କ୍ରୀଡା ପ୍ରତିଯୋଗିତା ଅନୁଷ୍ଠିତ
କୋରାପୁଟ: (ବ୍ୟୁରୋ ରିପୋର୍ଟ)କୋରାପୁଟ ଜିଲ୍ଲା ଅନୁସୂଚିତ ଜାତି ଓ ଜନଜାତି ଉନ୍ନୟନ ବିଭାଗ ପକ୍ଷରୁ ସ୍ଥାନୀୟ ସରକାରୀ ଏସଏସଡି ଉଚ୍ଚ ବାଳିକା ବିଦ୍ୟାଳୟ, ହରଡାପୁଟଠାରେ ଦୁଇ ଦିବସୀୟ ଜିଲ୍ଲା ସ୍ତରୀୟ କ୍ରୀଡା ପ୍ରତିଯୋଗିତା ଅନୁଷ୍ଠିତ ହୋଇଯାଇଛି। ଏହି ବୃହତ କ୍ରୀଡା ମହୋତ୍ସବରେ ଜିଲ୍ଲାର ୧୬୬ଟି ବିଦ୍ୟାଳୟ ଓ ଅନ୍ଵେଷା ହଷ୍ଟେଲରୁ ପ୍ରାୟ ୧୧୬୫ ଜଣ ଛାତ୍ରଛାତ୍ରୀ ଅଂଶଗ୍ରହଣ କରିଥିଲେ।ତିନୋଟି ବିଭାଗରେ ୨୪ଟି ପ୍ରତିଯୋଗିତାଏହି ପ୍ରତିଯୋଗିତାକୁ ସବ୍-ଜୁନିଅର, ଜୁନିଅର ଏବଂ ସିନିଅର ଏହିପରି ତିନୋଟି ବର୍ଗରେ ବିଭକ୍ତ କରାଯାଇଥିଲା। ମୋଟ ୨୪ଟି ଭିନ୍ନ ଭିନ୍ନ କ୍ରୀଡା କ୍ଷେତ୍ରରେ ଛାତ୍ରଛାତ୍ରୀମାନେ ନିଜର ଦକ୍ଷତା ପ୍ରଦର୍ଶନ କରିଥିଲେ। ଏହି କାର୍ଯ୍ୟକ୍ରମକୁ ସଫଳ କରିବା ପାଇଁ ୧୮ ଜଣ କ୍ରୀଡା ଶିକ୍ଷକଙ୍କ ସମେତ ୧୩୫ ଜଣ ଶିକ୍ଷକ-ଶିକ୍ଷୟିତ୍ରୀ ସହଯୋଗ କରିଥିଲେ।ଭବ୍ୟ ଉଦଘାଟନୀ ଉତ୍ସବପ୍ରତିଯୋଗିତା ପୂର୍ବରୁ ସ୍ଥାନୀୟ ବୁଢାରାଜା ପୀଠରୁ ଏକ ମଶାଲ ଶୋଭାଯାତ୍ରା ଅଣାଯାଇଥିଲା। ଏହାପରେ କୋରାପୁଟ ଜିଲ୍ଲା ମଙ୍ଗଳ ଅଧିକାରୀ ଶ୍ରୀ ସୁନୀଲ କୁମାର ତାଣ୍ଡି ଆନୁଷ୍ଠାନିକ ଭାବେ ଏହାକୁ ଉଦଘାଟନ କରିଥିଲେ। ଉଦଘାଟନୀ ଉତ୍ସବରେ ଅନ୍ୟମାନଙ୍କ ମଧ୍ୟରେ ସହକାରୀ ଜିଲ୍ଲା ମଙ୍ଗଳ ଅଧିକାରୀ ଅର୍ଜୁନ ନାୟକ, ରାକେଶ ବିଶ୍ୱାଳ, ବୈଶାଳୀ ଦୋରା, ଯୋଜନ ବେହେରା, ଜିଲ୍ଲା ଶିକ୍ଷା ଅଧିକାରୀ ଅଜୟ ମିଶ୍ର, ପ୍ରଧାନ ଶିକ୍ଷୟିତ୍ରୀ ପ୍ରମିଳା ପୂଜାରୀ ଓ ସ୍ଥାନୀୟ ସରପଞ୍ଚ ସୁଶିଳା ଚଲାଣ ଉପସ୍ଥିତ ଥିଲେ।ଉଦଯାପନୀ ଓ ପୁରସ୍କାର ବିତରଣଜିଲ୍ଲା ମଙ୍ଗଳ ଅଧିକାରୀ ଶ୍ରୀ ସୁନୀଲ କୁମାର ତାଣ୍ଡିଙ୍କ ସଭାପତିତ୍ବରେ ଅନୁଷ୍ଠିତ ଉଦଯାପନୀ ଉତ୍ସବରେ ଜୟପୁର ଆଇଟିଡିଏ ପ୍ରକଳ୍ପ ପ୍ରଶାସିକା ଶ୍ରୀମତୀ ତୃପ୍ତି ବରାଇ ମୁଖ୍ୟ ଅତିଥି ଭାବେ ଯୋଗ ଦେଇଥିଲେ। ସମ୍ମାନିତ ଅତିଥି ଭାବେ କୋରାପୁଟ ଆଇଟିଡିଏ ପ୍ରକଳ୍ପ ପ୍ରଶାସିକା ଶ୍ରୀମତୀ ସ୍ନେହପ୍ରଭା ମାଝୀଙ୍କ ସମେତ ବିଭାଗୀୟ ଅଧିକାରୀମାନେ ମଞ୍ଚାସୀନ ଥିଲେ।ଏହି ଅବସରରେ ଜାତୀୟ ଓ ଆନ୍ତର୍ଜାତୀୟ କ୍ଷେତ୍ରରେ କୋରାପୁଟର ନାମ ରଖିଥିବା ଦୁଇ ବିଶିଷ୍ଟ କ୍ରୀଡାବିତ ଶ୍ରୀ ବୈଭବ ତାଣ୍ଡି ଓ ଶ୍ରୀମତୀ ପ୍ରମିଳା କିର୍ଷାନୀ ଉପସ୍ଥିତ ରହି ଛାତ୍ରଛାତ୍ରୀଙ୍କୁ ସେମାନଙ୍କ ସଫଳତାର କାହାଣୀ ଶୁଣାଇ ଉତ୍ସାହିତ କରିଥିଲେ। ଶେଷରେ କୃତି ପ୍ରତିଯୋଗୀମାନଙ୍କୁ ପୁରସ୍କାର ପ୍ରଦାନ କରାଯାଇଥିଲା। ସମସ୍ତ ମଙ୍ଗଳ ସମ୍ପ୍ରସାରଣ ଅଧିକାରୀ ଓ ଶିକ୍ଷକ କର୍ମଚାରୀଙ୍କ ମିଳିତ ସହଯୋଗରେ କାର୍ଯ୍ୟକ୍ରମଟି ଶୃଙ୍ଖଳିତ ଭାବେ ସମାପ୍ତ ହୋଇଥିଲା।
