କୋଟପାଡ଼ରେ ନକଲି ବିଦେଶୀ ମଦ କାରଖାନା ଠାବ: ୨୦ ଲକ୍ଷରୁ ଅଧିକ ଟଙ୍କାର ମଦ ଜବତ, ଦୁଇ ଭାଇ ଫେରାର

କୋଟପାଡ଼, ୩୦/୧୨ (ବ୍ୟୁରୋ):
ନୂଆବର୍ଷ ପୂର୍ବରୁ କୋରାପୁଟ ଜିଲ୍ଲା ଅବକାରୀ ବିଭାଗକୁ ମିଳିଛି ଏକ ବଡ଼ ସଫଳତା। କୋଟପାଡ଼ ବୋଣ୍ଡାଗୁଡ଼ା ଅଞ୍ଚଳରେ ଚାଲିଥିବା ଏକ ବଡ଼ ଧରଣର ନକଲି ବିଦେଶୀ ମଦ କାରଖାନା ଉପରେ ଚଢ଼ାଉ କରି ବିପୁଳ ପରିମାଣର ନକଲି ମଦ ସହ ଅନ୍ୟାନ୍ୟ ସାମଗ୍ରୀ ଜବତ କରାଯାଇଛି। ଜବତ ହୋଇଥିବା ମଦର ଆନୁମାନିକ ମୂଲ୍ୟ ପ୍ରାୟ ୨୦ ଲକ୍ଷ ଟଙ୍କାରୁ ଅଧିକ ହେବ ବୋଲି ଜଣାପଡ଼ିଛି।
ଅବକାରୀ ବିଭାଗର ମିଳିତ ଚଢ଼ାଉ:
ଅବକାରୀ କମିଶନର ଏବଂ ଜିଲ୍ଲାପାଳଙ୍କ ନିର୍ଦ୍ଦେଶକ୍ରମେ ଜୟପୁର ଅବକାରୀ ଇନ୍ସପେକ୍ଟର ଶଶିକାନ୍ତ ଦତ୍ତଙ୍କ ନେତୃତ୍ୱରେ ଏହି ଚଢ଼ାଉ କରାଯାଇଥିଲା। ଏହି ସମୟରେ କୋଟପାଡ଼ ତହସିଲଦାର ତଥା ଏକଜିକ୍ୟୁଟିଭ୍ ମାଜିଷ୍ଟ୍ରେଟ ମଧ୍ୟ ଉପସ୍ଥିତ ଥିଲେ । ବୋଣ୍ଡାଗୁଡ଼ା ବସ୍ତିରେ ଥିବା ଏକ ଘରେ ଦୀର୍ଘ ଦିନ ଧରି ଏହି ବେଆଇନ କାରବାର ଚାଲିଥିବା ସୂଚନା ମିଳିଥିଲା।
ଜବତ ସାମଗ୍ରୀର ତାଲିକା:
ଚଢ଼ାଉ ସମୟରେ ଅବକାରୀ ବିଭାଗ ନିମ୍ନଲିଖିତ ସାମଗ୍ରୀ ଜବତ କରିଛି :
୧୫୩୫ ଲିଟର ନକଲି ବିଦେଶୀ ମଦ।
ବିଭିନ୍ନ ନାମୀଦାମୀ ବ୍ରାଣ୍ଡର ଖାଲି ବୋତଲ, ନକଲି ଲେବଲ୍ ଏବଂ ଠିପି।
ମଦ ପ୍ରସ୍ତୁତ ପାଇଁ ବ୍ୟବହୃତ ହେଉଥିବା HB ସ୍ପିରିଟ୍ ଏବଂ ବ୍ଲେଣ୍ଡେଡ୍ ସ୍ପିରିଟ୍।
ବୋତଲ ସିଲ୍ କରିବା ପାଇଁ ବ୍ୟବହୃତ ପଞ୍ଚିଂ ମେସିନ୍।
ରାକେଟ୍ ପଛରେ ଦୁଇ ଭାଇ:
ପ୍ରାଥମିକ ତଦନ୍ତରୁ ଜଣାପଡ଼ିଛି ଯେ, ଏହି ନକଲି ମଦ କାରଖାନା ପଛରେ ପଙ୍କଜ ଗୁପ୍ତା ଏବଂ ଅମିତ ଗୁପ୍ତା ନାମକ ଦୁଇ ଭାଇ ସାମିଲ ଅଛନ୍ତି । ଚଢ଼ାଉ ସମୟରେ ଏହି ଦୁଇ ଅଭିଯୁକ୍ତ ଘଟଣାସ୍ଥଳରୁ ଫେରାର ହୋଇଯାଇଥିବା ବେଳେ ଅବକାରୀ ବିଭାଗ ସେମାନଙ୍କ ନାମରେ ମାମଲା ରୁଜୁ କରି ତଦନ୍ତ ଜାରି ରଖିଛି। କୋଲକାତା ଏବଂ ରାୟପୁର ଭଳି ସହରରୁ ଏଠାକୁ ମଦ ପଠାଯାଉଥିବା ନେଇ କିଛି ସୂରାକ ମିଳିଛି ।
ନୂଆବର୍ଷରେ ମଦର ଚାହିଦାକୁ ଦୃଷ୍ଟିରେ ରଖି ଏହି ନକଲି ମଦ ବିଭିନ୍ନ ସ୍ଥାନକୁ ଚୋରା ଚାଲାଣ କରିବା ପାଇଁ ଯୋଜନା ରହିଥିଲା। ଏହି ଘଟଣା ପରେ ଅଞ୍ଚଳରେ ଚଢ଼ାଉ ପ୍ରକ୍ରିୟାକୁ ଆହୁରି ଜୋରଦାର କରାଯାଇଛି।